الثلاثاء، ٣٠ يناير ٢٠٠٧

الساعه كام؟!


الساعه كام؟! كان هو ده السؤال اللى سأله لى سواق الميكروباص اول ما وطأت قدمى عربته الميمونه ،ما طولش عليكوا طلعت الموبايل وقلت له الساعه 6-مش عيب ولا حرام-فاتت دقيقه ولسه محدش ركب الميكروباص غيرى
التفت السواق ليا و سألنى على حين غره وانا لا بيا ولا عليا "هو انت ليه رديتى عليا لما سألتك على الساعه؟" اتنفضت من مكانى وبصيت له وكانت نظراته مليانه استغراب وشك كأنى عملت جريمة ولا اتيت من الافعال ما يندى له الجبين-حلوه يندى دى- بينى وبينكوا كنت عايزه اصرخ لكن معرفتش افتح بقى اصلا- الجبن سيد الاخلاق- ودارت فى دماغى الشكوك ياترى ده من بتوع اصل انا عندى شعره ساعه تروح وساعه تيجى ، ولا يكون سفاح المعادى بس حب يعمل تمويه ويغير جو عندنا فى الجيزه ،وبصراحه مالت نفسى للتفسير التانى بالاخص انه تنطبق عليه الاوصاف اللى سمعنا عنها "اسمر الون ويلبس كوفيه وعنده شنب ودقن دوجلاس

مادانيش فرصه وقالى"اصل سألت مزمازيل قبلك وخافت ومرديتش تقولى الساعه كام" ربكوا والحق صعب عليا وخلانى طول السكه افكر هل كان تصرفى انا غلط انى رديت عليه ولا تصرف السيده اللى سبقتنى صح انها مرديتش عليه؟ هل انعدم الامان والثقه بينا للدرجه دى ان حتى ابسط الاسئله بنعتبرها معاكسه وغلط ؟ هل بقينا نخاف من بعض لدرجه تخلينا حتى السلام نفكر نرد عليه ولا لا؟

على اى حال نزلت من الميكروباص وانا ما زلت عند رأيى ان لو انعدمت الثقه وزادت الشكوك فى اللى حواليك مش هتعرف تعيش وهفضل ارد على كل اللى يسأنى الساعه كام؟

نزلت من الميكروباص وانا متأكده ان السواق حرم يسأل اى واحده تانى الساعه كام؟

هناك ٢٠ تعليقًا:

heba يقول...

والله يا شيكو عندك حق ، افضلي ردي على اللي يسألك الساعة كام ، الواحد مش ناقص وحدة وعقد لما كمان هيعيش وهو بيشك في كل اللي حواليه بس خلي بالك مش كل اللي يسألك الساعة كام تردي عليه برده .. ولا ايه ؟

غير معرف يقول...

انا معنديش خيار وفقوس كل اللى عايز يعرف الساعه كام وتمنها كام كمان اقوله
ماهو مش سر من اسرار الكون وان ماعرفش منى هيعرف من غيرى
يبقى اقوله ورزقى على الله

heba يقول...

شيكو ممكن اطلب منك تساعديني في تعديل شكل مدونتي ، بصراحة عاجبني شغلك في مدونتك وانك مخلياها بسيطة ورقيقة وهادية وانا لسه بتعلم لغة (الهتمل) فأنا معرفش اعدل في مدونتي بنفسي فلو انت موافقة هبدأ معاك واحدة واحدة يعني عايزة اصمم لها بانر وعايزة ارفع صوت وعايزة أغير بعض الأسامي الافتراضية وعايزة اضيف ساعة وعايزة اضيف عداد وهكذا ... واكون شاكرة جداً جداً ليك

غير معرف يقول...

بس كده ياقمر

هاقولك واحده واحده كل حاجه فى البلوج اتعملت ازاى باذن الله
والحكايه بسيطه

استنينى فى مدونتك

الحصان الأسود يقول...

انا اكرة من يسأل ويقول "الساعه كم؟" واكرة من يستوقفك ليسألك "أين شارع كذا؟

وغالبا لا ارد على من يسال بتلك الصيغه

فقد تعودت وتربيت انة عندما تريد شيئا من شخص ما وهو غير ملزم ان يفعلة فأقل القليل ان تُحسن الطلب و تطلب بإحترام

كأن تقول "الساعه كم لو سمحت؟" وان كنت أفضل البدأ بالإستأذان " من فضلك ... الساعه كام؟"

كذلك من يستدل على عنوان علية البدأ بالإستئذان قبل السؤال فهو ليس فرض عليك ولا هي جباية بل انت تتفضل علية وتعطية من وقتك و من معرفتك بلا مقابل
فأقل الواجب ان تطلب بأدب

وأيضا عليك الشكر بعد الإجابة, فمن افادك بمعرفة الوقت او العنوان فليس اقل ان تشكرة على فعلة قبل ان تنصرف عنة

لا أدري هل انا أعيش في عالم مثالي لا يمت للواقع
ام هل انا مريض نفسي

أم ان المجتمع هو من إنحدر وإنحدرت اخلاقياتة بصورة مزرية

غير معرف يقول...

من ناحيه تدنى الاخلاق للاسف هى سمه عصرنا هذا
ما من ناحيه كيفيه سؤاله لى فكان باحترام
لكن لا اعلم هل سأل من سبقتنى بنفس الصيغه ام ادرج كلمة غزل للجمله قبل ان يلفظها
ولكن الموقف عامه يسترعى الانتباه ويثير التساؤل

heba يقول...

شكراً يا شيكو ، انا في الانتظار

أخف دم يقول...

ازيك يا شيكو
على فكرة فيه حاجة احنا مش واخدين بالنا منها.. إن اللى عايز يعمل حاجة وحشة لاسمح الله مش هيسأل البنت عن الساعة الأول يعنى..يعنى لو كانت بعد واحدة ونص ينفع وقبلها ماينفعش.
مادام الأسئلة بريئة من التهم اللى احنا عارفينها يبقى إيه المشكلة.
وقوليلى بالحق:
الساعة كام معاكى؟

الأباصيرى يقول...

انا عن نفسى اى حد عايز يعرف اى حاجة بقولة عليها.. والناس لبعضيها برضة

بس فى الحقيقة الموضوع دة غلط عشان مبقاش فى حد المفروض نديلة الأمان

وبعديت كل واحد يجيب أدواتة معاة ساعة وخريطة وميقرفوناش بقى

سلام

غير معرف يقول...

اخف دم
بالفعل اللى عايز يعمل حاجه غلط مش بيستأذن الاول
تانى حاجه انت عايز تعرف الساعه بتوقيت جرينتش ولا حسب التوقيت المحلى لمدينه القاهرة

============
الاباصيرى
يا اخى انا مش عارفه ليه الناس متجبش العدة معاها مفك-ساطور-منشار يعنى الامر ميخلاش
نورت البلوج
سلام وتحيه

malak يقول...

انا من رأيى يا شيكو انك تردى على الناس مادام اسألتهم فى حدود الساعة يعنى اصله هيعرفها منك او من غيرك

heba يقول...

شيكو لو سمحت معلش تعباك معاي يارب اتعبلك في الأفراح ، عايزة ارفع صوت بقى بحيث اول ما افتح المدونة الصوت يشتغل معاها

Shiko يقول...

صح يا ملك اصل مصر مليانه ساعات وان معرفش منى على رأيك هيعرف من غيرى
نورتى المدونه ويارب دايما منوراها

Shiko يقول...

شموسه
مبروك على التجديدات
وان شاء الله هارد على سؤالك فى مدونتك اوك يا قمر

الحصان الأسود يقول...

شيكو

ههههه
ادرج كلمة غزل للجمله قبل ان يلفظها!!!!

أتخيل انة قال

اية يا عسل الساعه معاك كام

او

والنبي يا قمر ساعتك كام

او

اية يا سيد الحلوين ساعتك كام

او

ساعه الجميل كام دلوقتي

او

سأل الساعة كام؟؟ ولما قالتلة واحدة ونص
قاللها: طيب فين ؟؟

هههههههههههههه

غير معرف يقول...

ههههههههههههههههههه

بامانه الراجل كان فى منتهى الاحترام

وبعدين انا بنت جدعه محدش يقدر يقولى الكلام ده

بين قوسين
حقيقى انا مبسوطه ان الموضوع ضحكك والمود اتغير

الحصان الأسود يقول...

ربنا يخليكي لية يا شيماء يا اختي الصغننة

koukawy يقول...

انا شخصيا بقلق
معنديش ثقه في حد

غير معرف يقول...

هى بتختلف من شخص لاخر
وكمان حسب المود بتاعك يعنى ممكن تلاقى نفسك زهقان ومش عايز تكلم حد ساعتها هتطنش ومش هترد
وهكذا لكن بجد نورت يا كوكو

غير معرف يقول...

و الى معندوش ساعه يعمل اه يموت نفسه