الثلاثاء، 2 يناير، 2007

من ديوان نضارة نظر

للشاعر:محمود رضوان
مطلوب منك...انك

تهرب منك...وانك


تبعد عنك...وانك


ترمى حاجات جواك من سنك... وانك


تدبح فنك... وانك


تسرق دمع البوح من ننك... وانك


تطرح عنك كل معانى الحلم لانك


عايش وحدك وسط الناس....مشكلتك ...عندك احساس


*********


فيه ناس بتموت عشان كلمه


و ناس بتموت عشان حكمه


و ناس بتموت عشان لقمه


و ناس بتموت بعلو الصوت


و ناس بتموت ملانه سكوت


و ناس بتعيش عشان ذكرى


وناس بتعيش عشان بكره


وناس بتعيش عشان فكره


وناس بتعيش فى حضن الموت


وناس عايشه ومش عايشه


وناس ماشيه ومش شايفه


وناس تايهه وناس خايفه


وناس من جهلها بتموت


************


بننجرح


كل يوم لكن


بيفرحنا


ان انت جوه القلب ساكن فى افراحنا


وانت الامل فى العيون


والنشوه ساعه جنون


واياك تكون زيهم وتروح وتجرحنا


ده انت الوحيد منهم تقدر تريحنا


بننجرح


طب ليه بنجرح بعض


وليه يكون الشوك هو الدليل على الورد


وليه يضيع عمرنا بين الجراح والويل


واحنا اللى كان حلمنا الفجر بعد الليل


وليه يطول صبرنا من غير امل ودليل
واحنا اللى من حقنا ان الامانى تميل

هناك 15 تعليقًا:

الحصان الأسود يقول...

كل سنة وانتي طيبة

حبيت بس انبهك انك كاتبة
Dezainr Club
غلط والصواب بتاعها كالتالي
Designer

تحياتي

Shiko يقول...

اولا وانت طيب وبالصحه والسلامه

نورت البلوج وحكاية designer,dezainrدى عن عمد لانى اخدتها من اسم موقع عزيز على قلبى وانا مشرفه فيه

لكن على اى حال ميرسى على التصحيح ويعيش البنى ادم ويتعلم

واتمنى ان يكون الموضوع استوقفك اكتر من العنوان وان تترك احد تصميماتك او درس استفيد بيه ويستفيد بيه غيرى

تحياتى للحصان الاسود

الحصان الأسود يقول...

ناس بتعيش عشان ذكرى
وناس عايشه ومش عايشه
وناس ماشيه ومش شايفه

كأن الكلام دة بيوصفني وبيوصف حياتي

Shiko يقول...

ليه الحزن ده
بلاش تسجن نفسك فى ذكريات الماضى
أسوأ شئ فى الوجود ان الانسان يعيش بلا هدف والاسوأ منه ان يرفض الحياه
عزيزى لقد بدأت مشوار جديد فى حياتك تحمس له وحاول انجاحه واجعل دافعك فى هذا هو حب الحياهوالتغلب على الماضى بكل ما فيه
واعلم اننا لا نذوق طعم للنجاح الا بعد ان نتعثر فى عقبات الفشل

تحياتى لك واتمنى ان اسمع عنك من خلال مدونتك كل خير

الحصان الأسود يقول...

شيكو

مش عارف اقولك اية بجد

انتى بنت جدعه واخت

ربنا يحققلك كل احلامك

Shiko يقول...

ميرسى ليك واتمنى لك كل خير وسعاده

العمدة يقول...

ذكرتني بأشعار الفاجومي أحمد فؤاد نجم هل هي إحد أعمالة أم الديوان من تأليفك

Shiko يقول...

بالفعل تحس بروح احمد فؤاد نجم فى ابيات الشعر دى لكن يا عمده هى مش من اشعاره واكدب عليك لو قلت لك انى اعرف مين الشاعر لكن هى ابيات عجبتنى من قصقوصه جرنان وقلت تشاركونى اعجابى بيها

moona يقول...

انا قريت بالصدفه مدونتك لما كنت بعما بحث عن اي تعليق على ديوان نضارة نظر ، هي من اشعار الشاعر الكبير محمود رضوان و معلش عندي عتاب عليكي لان كل النلس اللي قرات افتكرت انها اشعارك كان المفروض ذكر هي اشعار من بس عموما دي عنوان مدونة الشاعر محمود رضوان http://elsha3erradwan.maktoobblog.com/
مدام الشعر عجبك يبقى هديه مني لاني من معجبي اشعار الشاعر محمود رضوان و فيها قصائد كتير ليه ( بالمناسبة بننجرح دي غناها محمد منير في اخر البوم ليه)
تحياتي لكم جميعا :)

Shiko يقول...

مرحب بك يا moona شرفت المدونة
بالنسبة لديوان نضارة نظر قرأته جزء منه فى احد الجرائد
وللاسف لم يكن هناك اى ذكر لاسم الشاعر صاحب المدونة فى الجريدة
ومن كثرة اعجابى بالديوان حاولت البحث عنه فى الانترنت لكن لم اصل لاى نتائج

اشكرك على المعلومة الجميله وعلى تشريفك للمدونه

moona يقول...

المهم ان الصوره وضحت ، ديوان الشاعر محمود رضوان (نضارة نظر) يباع في المجلس الاعلى للثقافه في مكتبة الاوبرا لو تحبي تشتريه كمان ، و اي خدمة يا ستي

غير معرف يقول...

شكرا على اهتمامك باشعارى وعلى فكرة اللى قراتيه دا كان منشور فى جريدة الدستورو كل اللى حصل دا اسعدنى بس عايز اقول مفيش شاعر كبير وشاعر صغير يااما فيه شاعر يااما مفيش و طبعا يسعدنى انك تعملى لينك على مدونتى وبالمناسبة انتى احساسك كمان عالى جدا وان شاء الله تكونى حد مهم فى المستقبل القريب جداوكل الشكر لحبيبة قلبى مونا زوجة المستقبل انها عرفتنى على شخصية مهمة زيك

shiko يقول...

اشكرك يا moona على تعليقك وايضاحك
(كنت دايخه على الديوان كتر خيرك)
انازعلانه منك عشان مش قلت لى انك خطيبه الشاعر محمود رضوان
دعوة من قلبى ان ربنا يهنيكم وحقيقى شرفتونى بمروركم على مدونتى المتواضعه

shiko يقول...

حقيقى البلوج نور يا استاذ محمود
واسفه لجهلى بشخصك فى البدايه
ده شرف كبير لى انى اتعرف على شخصيه جميله زيك
واشكرك على كلمات التشجيع
واتمنى ان لا تكون اخر زيارة لك فى مدونتى

arabcooL يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه