السبت، ٣ مارس ٢٠٠٧

مولد ستنا الشجرة

اسيبكوا تتفرجوا على الفيديو الغالى ده وبعدين نتكلم


http://www.livevideo.com

طبعا مفيش حد فى مصر إلا وسمع عن الشجرة اللى فى اول طريق مصر اسماعيلية الصحراوى
الشجرة اكتشفها جندى نبطشي بالمعسكر حينما وجد ضوء شديد يأتى من الشجرة فنادى على زميله وذهبوا اليها فوجدوا الشجرة مكتوب عليها الله محمد طه
لكن الملفت للانتباه هو ان بعد ظهور الكتابه على الشجره تزاحم الناس عليها وكأنه يوم الحشر و هات يا تصوير بالكاميرات والموبايلات
واخشى ما اخشاه ان تحول تلك الشجرة الى مزار يقصده الجهلة وقليلى الفهم عشان يستباركوا بيها
الفيديو ده جالى حصريا من احد اقاربى وهو بيمر على هذا الطريق كل يوم -متجها الى عمله- ولم يكن هناك ما يسترعى الانتباه فى تلك الشجرة بل كانت شجرة كمثيلتها من الشجر حتى اكتشاف الكتابه عليها
وهناك بعد الاراء التى لا اعرف مدى صحتها تشكك بان الكتابه من صنع احد العساكر باستخدام زونك بندقيه بغض النظر ان كانت بالفعل معجزة الهية او بعمل يد بشريه فهذا لا يمنع من ان ايات الله حولنا كثيرة ويجب ان نسبح الله عليها ونحمده على فضله
ما جعلنى اكتب عن تلك الشجره هو استغلال البعض للحدث الذى دوى اعلاميا واصبح محل حديث المدينه فقاموا ببيع صور الشجرة بعشره جنيهات وبيع الفيديو بعشرين جنيه، يعنى حتى المعجزات حولناها بيزنس وسبوبه نسترزق منها

هناك ٣٣ تعليقًا:

VEЯŎ يقول...

ازيك يا شيكو سبحان الله على معجزاته اللي بتبان للناس كل يوم المفروض الحجات دي بتخلينا نزداد ايمان وخوف وخشوع من الله وتفكرنا بقدرة ربنا في اي شيء وتخلينا نرجع لربنا بعد ما كلنا بقينا بعيد عن ربنا في ظل الحياة اللي احنا عايشيين فيها ، ثاني حاجه زي ما بتقولي بقه عندنا مشكلة اي حاجه غريبة تحصل بقت الناس تروح للحاجه دي وتبني عليها جامع او يقعدو جنبها يتبرككو بيها على فكرة من واجب الشيوخ ومن واجب المتعلمين انهم ينصحو الفئة دي بان كل اللي بيعملوه ده غلط وشرك بالله وكمان واجب الشيوخ في الجوامع في الخطب انهم ينصحو الناس بانو موش صح وغلط وشرك بالله حاجه تانية حكاية انك بتقولي ان الناس بتبيع الفيديو ده بعشرات الجنيهات حاجه تحزن على شوية لو طلعت اشاعة ان الرملة دي بطول العمر الناس هتشتريها وهتاجر فيها حاجه غلب وشعب غلبان وحياة بقة صعبه وربنا يحرمنا بحييكي على موضوعك ده واتمنالك التوفيق دايما

مـحـمـد مـفـيـد يقول...

والله انا شايف اننا بنصدق الاكاذيب ونعيش فيها
دونطلق العنان
موضوع الشجره ده اكبر فيلم الشعب المصر يبيعيشه الان

غير معرف يقول...

فيرو
انت فينك ليك كتير ما نورتش البلوج بردودك الجميله
بالفعل احنا مش محتاجين ظهور اسم الله على شجره عشان نؤمن بوجود الله او نشوف قدرته فى كل اللى حوالينا من مخلوقات
وربنا يحمينا من الوقوع فى الشرك
تحياتى لك

غير معرف يقول...

ابو عبدالله
ايه النور ده كله
الناس عايزه اى شئ تتلهى فيه
ولكن سواء الحكايه دى معجزه من السماء او بفعل فاعل ادمى فهى ليست مبرر كافى للاسترزاق منها والتهافت عليها بالشكل الغريب ده
وموضوع الشجرة مثله مثل موضوع هاله سرحان من الافلام الهندى البايخه اللى شغلت الرأى العام
املنا فى ان تحدث معجزة من السماءوتفوق الناس من الغيبوبه

غير معرف يقول...

السلام عليكم

إزيك يا شيكو - مدونتك شكلها إن شاء الله هتنتشر و يكون لها مستقبل .. دي أول زيارة ليك هنا


--- بخصوص مقالك عن الشجرة المباركة -- الحق أقول أنني لا أجد سببا يجعل الناس المثقفين العقلاء يهتمون بامر تلك الشجرة - أينقصنا شئ من اليقين أو كل اليقين لنعرف أن الله واحد أحد و أن محمد رسولة عليه الصلاة و السلام - علي رأي قول محمود درويش فكل ما سيكون كان - قضي الأمر - عن أي معجزة يبحثون ؟ ! دعنا من ذلك - طيب ما العمل الذي ترتب عليه رؤيتهم لتلك الشجرة - هل ثاروا الطغاه بإفتراض أن الثورة علي الطغاه من طاعه الله - هل إلتزمت كل أنثي بالزي الشرعي - هل أتقن العامل عملة بعد أن راي تلك المعجزة المزعومة -- أشك !! إن هي إلا عقدة التعلق بأحبال مهترئة -

لنا الله و من ثم جهدنا

koukawy يقول...

احنا الشعب عندنا من جهله عايز اي رمز و يتمسح فيه
لا جول و لا قوة الا بالله

غير معرف يقول...

عمده
اهلا وسهلا بيك فى البلوج
ان الله لا غير ما بقوم حتى يغيروا ما بأنفسهم
وطول ما فيه فى مجتمعنا تجاوزات وطول ما كل واحد بيقول انا ومن بعدى الطوفان
يبقى ربنا يلطف بينا

تحياتى

غير معرف يقول...

فيه ناس ضحاله تفكيرها وبساطه عقلها بتخليها تتخيل ان مجرد التمسح بشبابيك الأضرحه والوقوف على ابواب مساجد الاولياء ما يقربها من الله
وطبعا كل ده تفكير خاطئ ولذلك على الشيوخ دور كبير فى توعيه الناس بان هذا شرك بالله
وان ليس بين الله والعبد الصادق حجاب

Shiko يقول...

منورة يا كوكو
ومفيش فى ايدينا غير القاء الضوء على الاخطاء من خلال التدوين حتى لو مش هنقدر نغيرها
تحياتى

raspoutine يقول...

دعوة عامه لكل المدونين المصريين لحضور اللقاء الثالث الذى تحدد موعده من قبل المشرفين عليه والمؤسيسن له


وذلك يوم


الجمعه الموافق 9/3/2007


بدار الاوبرا المصريه


كوفى شوب الابداع


بجوار دار الابداع بداخل الاوبرا


والدخول للمكان من البوابه الخلفيه للاوبرا امام النادى الاهلى


والحضور بالملابس الشتوية


واوجه الدعوة خاصة الى الاخوات المدونات

هنستناكى يا شيكو


ايمن فاروق

غير معرف يقول...

راسبوتين
ميرسى على الدعوه
وفى الحقيقه كنت اتمنى اكون معاكوا لكن ظروفى لا تسمح للاسف الشديد:(
ولذلك فانا ابعث بسلام خاص لك ولكل المدونين من اصدقائنا مع صديقنا دكتور اسامه الدبور
متمنيه ان تستمتعوا باوقاتكم ويكون اجتماعكم مثمر

تحياتى

Yasser Hussein يقول...

انا ساكن في مدينة العبور ويوميا بأعدي هاى المكان ده وكان مزدحم جداً ومكنتش أعرف السبب لحد وقت قريب عرفت من أحد الصحف ...
أما بالنسبة لتحويل أي حاجة لبيزنس فمعلهش زي ما بيقال
الجوع كافر
والحاجة أم الاختراع
وعجبي
ياسر حسين
فنان كاريكاتير

غير معرف يقول...

استاذ ياسر حللت اهلا ونزلت سهلا

انا مش معاك فى ان البنى ادم يرتكب الخطأ ويعلقه على شماعه العوز لان مهما كانت الغايه فهى لا تبرر الوسيله

بالتالى مينفعش اتاجر باسم الدين والمعجزات وابتغى من وراءه الرزق

مش كده ولا ايه؟

تحياتى

أخف دم يقول...

شى الله ياشجرة .. حى .. حى ..
وكمان شوية يعملوا تيشرتات عليها صورة الشجرة .. وآيس كاب كمان .. وتنزل على أغلفة كراريس العيال ..
العالم دى اغبيا .. دا انا صورتى نفسها لسة منزلتش على الحاجات دى..

غير معرف يقول...

معلش يا عم اشرف اعذرهم
اصلهم جهلة في حد ميعرفش اشرف توفيق
اخف دم فيهم كلهم
يعنى هى جت على الشجره ولا الشجرة مالهاش نفس يعنى
ماهو فيه اسامى كتير وشخصيات فى مجتمعنا بتاخد اكتر من حقها

heba يقول...

حلوة أوي " ستنا الشجرة " دي
للأسف فعلاً الناس بتجرد أي حاجة من معانيها الأصلية يعني بدل ما يتفكروا ملياً في معجزة ربنا سبحانه وتعالى يروحوا يبيعوا الصور ومش بعيد حد يعلن ملكيته للشجرة ويخلي الفرجة بفلوس
حقهم يقطعوها زي ما عمر بن الخطاب رضي الله عنه قطع شجرة الرضوان قبل ما الناس تفتن بيها وتعملها مزار زي ما قولتي بس في الآخر .. سبحان الله

غير معرف يقول...

لم اجد غيره عنوان يعبر عن تلك المهزله

كما قلت يا شمس هذا هو سداد التفكير فالشيطان سول لامم من قبل عباده اصنام كانوا قد صنعوها لعباد صالحين

مرورك اسعدنى يا شموسه

الدبور يقول...

طبعا موضوع الشجرة ده كلام فاضي و الناس اللي بيفكروا انها ممكن تكون ليها بركات و الكلام الفاضي ده اكيد طبعا بيشركوا بالله

عموما ربنا يهدي الجميع
ويقطعوها و يرحوا الناس

تحياتي
الدبور

عمرو غريب يقول...

الموضوع جميل وارجو كتابة الكثير من الموضوعات

koukawy يقول...

فينك يا شيكو شيكو
ياه ه ه ه بقالك كتير اوي مختفيه انا كل يوم بدخل ابص
ملاقيش جديد

الأرمـوطــي يقول...

اعتقد ان الشجرة دى لو شكلها كده طبيعى تبقى ايه من ايات الله ق ت(سنريهم اياتنا فى الافاق وفى انقسهم )
لكن طبعا ان الناس يخدوها مزار عشان يعنى تقربهم من ربنا فده حرام ق ص
لعن الله بنى اسرائيل اتخذوا قبور) رهبانهم واحبارهم مساجد)او كما قال لكن المعنى واحد

الحصان الأسود يقول...

دة علامة من علامات ضعف الايمان

المفروض اننا مؤمنين بالله و بوجودة وبرسولة ومش مستنيين دليل

المهم انتي فين يا شيكو بقالك كتير ماكتبتيش جديد

تحياتي

ana ga3an يقول...

معلش سؤال ناقح علي اوي
الفيديو دة من ابو عشرين؟؟

غير معرف يقول...

د/ اسامه الدبور
ايه النور ده كله
يسمع منك ربنا ويقطعوا الشجرة
لان اسوأ شئ هو التقرب لله من خلال المخلوقات
والأسوأ منه الاتجار بالدين لتحقيق مكايب شخصية
الله يرحمنا برحمته

غير معرف يقول...

ميرسى عمرو

المدونه نورت بوجودك

وفى اقرب وقت ارد لك الزيارة باذن الله

تحياتى

غير معرف يقول...

كوكو

حقيقى وحشتينى

ميرسى على سؤالك الدائم عليه
انا موجوده لكن هى شوية مشاغل
هاعمل بوست رومانسيكى قريب باذن الله

اتمنى يعجبكم

غير معرف يقول...

كلامك صحيح يا ارموطى
وفى رأيى سواء كان موضوع الشجرة ده حقيقى او مختلق
فيجب لعدم الوقوع فى الشرك قطعها

نورت يا ارموطى

تحياتى

غير معرف يقول...

اخى العزيز الحصان الاسود

ميرسى على سؤالك

انا بخير لكن الالهام والكتابه بمزاج
لا يتفقان مع متطلبات العمل اللى مخليانى مش عارفه ليلى من نهارى

ادعى لى بالتوفيق

تحياتى

غير معرف يقول...

بينى وبينك
هى جت لى هبه من واحد
شافنى غلبانه صعبت عليه طبق ايديها واداهانى
شحاته يعنى:)
ما علينا بجد انت نورت وياريت الزيارة تتكرر

Tamer Nabil Moussa يقول...

ممكن يكون صدفة

والكتابة والشكل العام اتكون ليها صدفة

اصل سمعت مواضيع كتير زى الشجرة بس فية البيضة والنحلة.

وكلها انكتب عليها الاسم الالهى


لكن حكاية النور دى بقى جديدة

الله اعلم بمضمون الكتابة.


تحياتى

david santos يقول...

Hello!
Thank,s for you work and have a good weekend

الدبور يقول...

فين البوست الجدي
انا منتظر

الدبور

غير معرف يقول...

الله يرحمك شيكو