الاثنين، ١٨ ديسمبر ٢٠٠٦

حركات قرعه

هاتكلم عن الرسايل العجيبة اللى بتيجى على الموبايل اليومين دول
اول رسالة وصلتنى من احدى شركات المسابقات ومحتواها :المجوهرات والسيارات الفخمه فى انتظار اشترك فى مسابقتنا الدينية
وادعت انها قناة أقرأ انا قلت اشترك وبصراحة الاسئله كانت قوية لكن مقتدرش اصمد للنهايه وضاعت ربع ساعة من رصيد الكارت بتاعى بس الحمد لله انها ضاعت فى حاجة مفيدة
بعد يومين بالظبط قرأت فى الجرائد تكذيب من قناة اقرأ انها ليست المنظمة لتلك المسابقة قلت يالا الكارت خد الشر وراح
ثانى رسالة وصلتنى الساعة 2بالليل وذلك بعد اكثر من رنة والنمرة طبعا معرفهاش وانا نايمة زى القتيل
ومحتوى الرسالة:"كلمنى من فضلك " -رسالة فودافون المجانية الشهيرة-المهم قتلنى الفضول واتصلت رد عليا صوت خشن وقال ايه عايز يتعرف عليا
مش بالذمة حرقة الدم-على رأى الكابتن تامر حسنى-فيه حد مستقصد الكارت بتاعى وشكلى هابيع الموبايل عشان استريح
الرسالة الثالثة واكيد دى عدت عليكوا هى واحد يقولك الرسول عليه الصلاة والسلام او احد اهل البيت زاره فى المنام وقاله ابعت كلمة لا اله الا الله ل30شخص وهتسمع بعد اربعة ايام خبر سار واذا مابعتهاش ستحل عليك اللعنات والمصائب برضو فى خلال اربع ايام
تبقى اللى عايزة تتجوز ولا اللى عايز يشتغل يجرى يبعت الرساله ل30شخص وممكن يبعتها 30مرة لشخص واحد هى التجارة بقت كمان فى الدين
طبعا ذكر الله لايكون مرهون بوقت معين او عدد محدد كما ان المصائب والاخبار السارة لا يمكن ربطها برسالة موبايل ولكنه قدر كتبه الله تعالى ولا يمكن دفعه الا بمشيئة الله تعالى
ومازالت سيل الرسايل العجيبه لا ينقطع
عايزه اعرف ايه اغرب او اطرف رساله وصلتكوا؟

هناك ٧ تعليقات:

Unknown يقول...

والله يا ابله شيماء حكايه الموبايلات دى حركات نص كم بس يا ياريت ماتبيعيش الخط إلا لما اعاكسك الاول اوعى تنسى يا صديقتى

Shiko يقول...

سموح نورت والله البلوج المتواضع

متقلقش مش هبيع الموبايل ومستنيه معاكستك بس خليك قدها وعاكس هههههههه
انت عارف اللى يستخدم الموبايل ميعرفش يستغنى عنه للاسف

الحصان الأسود يقول...

متهيالي ان شركات الموبايل هيه اللي بتروج لرسائل ابعت ل 30 و حايجيلك خير او ماتبعتش و حيقع على دماغك مصيبة

طبعا دي سلسلة متوالية من الرسائل تساوي ملايين

وطبعا دة حرام

و اللي يصدق في الخرافات والخزعبلات دي و يبعت الرسائل دي بيقى في ضلال

يا جماعه الاسلام مش دين خزعبلات

Shiko يقول...

انا باقول هى رزق الهبل على المجانين

وحتى اذا كانت زى ما بتقول حركه من شركات الموبايل المفروض الناس فيها عقول توزن بيها تصرفاتها

ميرسى يا الحصان الاسود

koukawy يقول...

انا جتلي في نفس اليوم رسالة فودافون الشهيره علي رأيك كلمني 00
اول مره جت حلقت00و بعد شويه جت تاني من نمره معرفهاش 00و بعدين تاللت مره و كان الوقت مثلا الساعه 2 بليل00
المهم قلت ليكون حد في ورطه و لا حاجه اهو الواحد ياخد ثواب00
و كان ساعتها مافيش سوبر فرفشه قالدقيقه كانت غاليه00اتصلت يا ستي00و لقيته بيقوللي ايه يا حج احمد قولتله نعم 00
قاللي مش موبايل الحاج احمد ده00
قولنله لأ و انا متعصبه جدا و قفلت في وشه السكه00و كان علي لساني اقوله يا ابن التييييييييت00خلصتلي الرصيد و انمت ابعيد احول مش عارف تضرب النمره و كمان تلت مرات تبعت رساله غلط
و من بعدها مبتصلش بأي نمره غريبه لو رنت و لا بعتت 80 مره حتي00
و اللي عايزني يتصل انا مبتصلش بحد
lol
ياه ه ه كل ده كومنت00ربنا معاكي بقي في القرايه يا شيكو

غير معرف يقول...

يا كوكو
هى حاجه تغيظ واساءة استعمال للموبايل
لكن هنعمل ايه بالمناسبه انا شربت المقلب ده لمره تانيه بس كان عباره عن رساله فيها امانه ولازم ترسلها لخمسه اشخاص وباذن الله هتسمع خبر جميل
طب رغم ثقتى ان ارادة الله لاتتوقف على ارسال رسالة موبايل الا انى استحرمت الغيها وبعتها لمجموعة من الاصدقاء
اللى بدورهم بعتوا لى اعتذار ان الرصيد لايسمح
وبالمناسبه اكتشفت انا كمان بعد الارسال ان رصيدى خلص
انتى نورتى اكتبى بس كومنتس ولا يهمك

SoMa يقول...

السلام عليكم
اسمي حسام وكونت باسيرش على حاجه وقابلني الموضوع ده وحبيت اشارك بعد اذنك طبعا يا شيمو
بصوا بقه في رساله اغرب من كده يا جماعه عادة انت لما تحول لحد رصيد بيوصله مع الرصيد رساله من 686 بتقول انه اتحوله رصيد بمبلغ معين لكن الغريبة ان الرساله توصلك ومكتوبه بنفس الصيغة وبعدها تلاقي حد بيتصل بيك ويقولك انه حول الرصيد غلط وانه كان بيحوله لحد تاني بس غلط في الرقم وانت ياولداه يصعب عليك وتبعتله الرصيد وبعد كده تكتشف انها نصبة وان الرساله اللي جاتلك في الاول مش من 868 لا ديه من الرقم اللي نصب عليك وانت طبعا مش اخدت بالك مبعوته منين
خلى بالكوم بقه يا جماحه اه يا جماحه



على فكره يا شيمو رزق الهبل مش على
المجانين
عشان رزق الاتنين على الله
سلام بقه كفايه رغي يا بااااااي عليكوم